Pagadian City – Dul-an siete milyones nga kantidad sa mga alahas ang nadala sa mga tulisan dihang nahitabo ang pagpanulis sa kadalanan alas 8:21 kagahapon sa buntag dihang dapita sa Brgy. Tiguma niining syudad sa Pagadian partikyular sa atubangan rehonal nga opisina sa Department of Education.
Samaran ang usa sa mga biktima nga nailing si Renante Armenion Ronolo, 28 anyos, ML Lhuiller Company driver samtang naluspad usab sa kakuyaw ang ML Lhuiller Area Manager nga si Ades Cortez Ares, 54 anyos residente sa Ipil, Zamboanga Sibugay apan teporaryo nga nagpuyo sa Brgy. Gatas ning dabayan.
Sa imbestigasyon sa PNP Pagadian nasayran samtang gimaneho ni Renante ang Toyota Innova Silver gray nga nagtangag sa plaka numero YFR 405 og sakay usab ang area manager diin paingon ang ilang byahe sa Pagadian City Airport, kalit nga nilakdap sa ilang gisakyan ang laing sakyanan nga Toyota Vios kolor grey nga dunay plaka numero AEB 7356 og nibabag kini sa ilang agi-anan.
Pas-pas nga ninaog sa maong sakyanan ang tulo ka mga suspek armado sa wala matino nga armas og miti-on kanila, usa sa suspetsado ang nihapak og martilyo sa bintana nga bahin sakyanan hinungdan nga sa pagkabuak sa samin og didto na nakahigayon ang mga suspetsado sa pagkuha sa mga gamit nga dala sa mga biktima.
Lakip nga gidala sa mga tulisan ang usa ka sling bag nga gisudlan sa usa ka TB USB nga mobalor sa P3,500, duha cellphone nga mokantidad sa P68,000 ug keypad nga tag P500.
Natangag usab sa wala maila nga resposable ang mga nagkalain-laing alahas nga mobalor sa kinatibukan sa P6, 941,175.
Nadala usab og cash ang mga suspetsado nga mokantidad sa P645, 850 apil nga nabiking ang laptop nga mokantidad sa P26,000. Human mahibasa ang maong mga butang daling nisibat ang mga tulisan.
Sa ulahing impormasyon nga nakuha sa RMN Newsteam nagsunod sa sakyanan sa mga biktima ang Regional Manager sa ML Lhuiller nga si Emmalinda Belara Regencia nga sakaya usab sa pick-up nga gimaneho ni Avelino Varquez Jr., ilang nakita ang armadong kalalakin-an nga nitulis apan gumikan sa kahadlok nakadesisyon sila nga mobalik sa ilang gi-again.
Gialerto na usab ang kapulisan sa silingan nga lungsod sa syudad pinaagi sa pagmontar og mga checkpoint aron sa posibleng pag-aresto sa mga responsible.
Gipalawman usab karon ang pagsusi sa imbestigador sa Pagadian City PNP labot samaong hitabo.
