Roxas City, Capiz – Arestado sang mga katapo sang Criminal Investigation and Detection Group (CIDG-Capiz) ang isa ka persona nga nagabaligya sang pampahulog sang bata sa Altavas Street, Roxas City. Ginkilala ang suspek nga si Judy Labrador y Capapas, 46-anyos kag residente sang Barangay Dayao,syudad sang Roxas.
Ginpahayag ni Pcinsp. John Paul Tovera, hepe sang CIDG-Capiz nga may nagpalab-ot sa ila sang impormasyon nga madugay na nga nagabaligya sang abortive pill nga Cytotec si Labrador sa iya sini nga stall. Ginpaidalom sa surveillance sang mga otoridad sa sulod sang isa ka semana ang aktibidad sang suspek antes ginkasa ang operasyon kahapon. Narekober sang mga otoridad ang 77 ka tablet sang Cytotec kag P100 nga cash sa mga kamot sang suspek.
Suno pa kay Tovera nga nagbayolar sang Republic Act 10918 ukon Philippine Pharmacy Act si Labrador bangud wala ini sang nagakaigo nga licensya ukon permiso sa pagbaligya sang amo nga bulong.
Natalana nga pasakaan si Labrador sang kaso nga paglapas sa Republic Act 10918 ukon Philippine Pharmacy Act. Sa interview sang DYVR RMN Roxas sa suspek, gin-ako sini nga nagapabaligya gid man ini sang amo nga bulong nga ginagamit sang mga nagabusong nga luyag ipahulog ang ila ginadala, agud gid lamang makakwarta.
Suno pa sa suspek nga madamo sang nagapangita sang amo nga bulong kag ginabaligya sini sang P250 tubtub P350 ang kada tableta. Magluwas sa bulong nga pampahulog, nagabaligya man si Labrador sang mga herbal kag kahoy-kahoy sa iya nga puwesto.
