Dakop ang notoryus nga holdaper sa ginhiwat nga hot pursuit operation sang Leganes PNP kaina sang hapon.
Ginkilala ang suspek nga si Ricky Sabido, 37 anyos, isa ka ex-marine kag pumuluyo sang Delgado St. Sta. Barbara, Iloilo.
Ginpahayag ni Police Sr. Inspector Dadjie Delima, hepe sang Leganes PNP nga mga alas 4 kaina sang hapon sang ginhold-up sang suspek sa barangay Guinobatan , Leganes ang isa ka delivery van sang Japan Tobacco International kon sa diin nakuha sa duha ka pahinante ang 2, 500 pesos nga cash kag gilayon nga nagpalagyo sakay sa motorsiklo.
Gilayon naman nga nagreport sa mga pujlis ang mga biktima kag madasig man nga naghulag ang kapulisan kag naghiwat sang hot pursuit operation nga nagresulta sa pagkadakop sa suspek sa Bangga Mauring, Leganes.
Suno kay Delima nga ang suspek ang notoryus nga holdaper nga naga-operate sa second kag fourth district kag target sini ang mga delivery van.
Narecover sa suspek ang 3 mil pesos nga cash, granada, isa ka 45 kalibre nga pistola kag isa ka sachet sang illegal nga druga.
Yara na napreso sa Leganes Police Station ang suspek kag magapangatubang sang madamo nga mga kaso.
