Nadakpan na ang suspek nga nagbuno, nagsunog kag nagpatay sa mag-amay nga Antonio Padua, 66 anyos kag April Re-anne Padua, 7 anyos sang Hacienda Pula, Brgy. Kapitan Ramon, Silay City, Negros Occidental.
Suno kay Police Supirentendent Noel Polines , hepe sang Silay City PNP , nagpadulong kaina sang aga sa Silay City Police Station ang iloy sang 7 ka tuig nga bata nga si Rogelia Landao, 44 anyos kag gintuad ang matuod nga natabo.
Ginpahayag ni Polines nga santo sa ila pagpangusisa , naakig ang suspek nga si Arnel Aguilar, 29 anyos kag live-in partner sang anak ni Landao sa una niya nga bana bangud indi ini paghatagan ni Padua sang kwarta halin sa iya kita sa tubo nga ginabulubanta 16 tubtob 20 mil pesos.
Nadugangan pa ang kaakig ni Aguilar bangud naruya ini tungod wala sa lugar nga iya ginkadtuan ang birthday party ni Re-anne .
Bangud sini, nagkitaay sanday Aguilar kag Landao agud dayunon ang plano nga kuhaon ang kwarta kay Padua.
Ginsulit naman ni Landao kay Aguilar nga indi pagsakiton ukon pagpatyon ang iya mag-amay.
Ginpahayag ni PSupt. Polines nga sang nag-abot sanday Aguilar kag Landao sa balay ni Padua, nag-istoryahanay pa ang mga ini apang bangud wala ginhatag ni Padua ang kwarta tungod nadeposito na sa bangko, ginbuno kay ginlabo ni Aguilar si Padua.
Bangud nakita sang 7 ka tuig nga bata ang krimen, nagsinggit ini nga “mama” apang nakita siya sang suspek kag ginlabo man sa liog.
Ginpahayag ni PSupt. Polines nga nakita man ni Landao ang krimen apang nagpalipod lang ini sa kasagingan samtang ginapamatian ang pagsinggitan sang anak kag ginalantaw ang makasiligni nga krimen.
Ginguyod naman ni Aguilar ang bangkay ni Padua sa gwa sang balay kag ginsampaw ang bangkay sang bata kag gintutdan.
Natukiban man sang kapulisan nga nakigbulag kay Aguilar ang manak (stepdaughter) ni Padua bangud iya ini ginakastigo.
Samtang, wala naman nagatiner si Rogelia Landao sa balay sang iya mag-amay bangud may bag-o naman ini nga live in partner.
Suno pa kay PSupt. Polines, gin-ako sang suspek nga si Arnel Aguilar nga natabo man sila ni Landao .
Natalana nga pasakaan sang kaso nga double murder si Arnel Aguilar samtang kaso nga Parricide kag double murder man ang paga-atubangon ni Rogelia Landao bangud may kahilabtanan ini sa krimen.
Madumduman nga una na ginpahayag ni Landao nga naga-ubra siya sa Talisay City sang natabo ang krimen kon sa diin, naga-istorya siya sa telepono agud tamyawon ang anak sa iya kaadlawan sang hinali lang may nag singgitan sa pihak nga linya tubtob nag-out of coverage na ang telepono.
credit: TV Patrol Negros
