Gin-aresto sang Anti-Kidnapping Group (AKG)-Visayas sa Distrito sang Molo ang suspek nga nagkidnap sang bata sa Gingoog City, Misamis Oriental tatlo ka tuig na ang nakaligad.
Sa gahum sang warrant of arrest, gin-aresto sang AKG ang suspek nga si Cherry Mae PatiƱo Babao, 20 anyos sang Zamboanga del Sur, samtang nakapalagyo naman ang live-in partner sini nga si Emran Gaeon Laguindab.
Ginpahayag ni Ann Rapunzel Ganzon sang Crisis Intervention Unit sang CSWDO nga ginkidnap nanday Babao kag Laguindab ang bata sang 2015 nga sadto anay naga-edad sang 9 ka tuig kag gindala diri sa siyudad sang Iloilo kon sa diin nagtener sila barangay Kasing-kasing, Molo.
Humalin sang 2015 tubtub subong nangin makalolooy ang kahimtangan sang bata sa kamot sang mag-live in matapos ginahimo nila ini nga ulipon kag masami nga ginasakit kon sa diin ginapabaligya nila ini sang mga DVD.
Suno kay Ganzon nga nakaagi dakop ang bata sa paglapas sa curfew for minors kag ginbalik sa mag-live in nga una ginpatihan nila nga ginikanan sini.
Sa pihak sini, liwat nga nadakpan ang bata sa amo gihapon nga violation kabangdanan gin-custody sang CSWDO ang bata kag ginbuligan nga maka-eskuwela apang wala sang mahatag nga Birth certificate ang mag-live in tubtub nga nag-ako ang babaye nga indi nila matuod nga anak ang bata kag ila lang ini ginkidnap sa Gingoog City.
Bangud sini, nag-coordinate sa mga otoriddad ang CSWDO kag ila na-locate ang matuod nga ginikanan sang bata kon sa diin nahibaluan nga trisikad driver gid lang ang amay sini sa Gingoog City kag patay na ang iloy.
Nahibaluan nga naki-istar lang sa pamilya sang bata sa Gingoog City sanday Babao kag Laguindab apang bangud sa handum nila nga makaangkon sang anak, ila gintaban ang bata kag ginpalagyo kag nakalab-ot sila diri sa Iloilo.
Sang nagligad gid lang nga adlaw, nag-reunite ang mag-amay matapos nahamulag sa isa kag isa sa sulod sang tatlo ka tuig.
Kahapon nga adlaw, gin-aresto man sang AKG ang mag-live in apang nakapalagyo ang lalaki kag si Cherry Mae PatiƱo Babao lang ang nadakpan.
