Dao, Capiz – Magapangatubang sang kaso ang barangay kapitan sang Brgy Centro, Dao, Capiz matapos ini ang nakuhaan sang armasluthang sang ginserbehan sang search warrant sang mga katapo sang Criminal Investigation and Detection Group (CIDG)- Capiz.
Ginkilala ang subject person kay Kapitan Jonathan Lopez Escorpion.
Target sang operatiba ang duha ka mga calibre sang armasluthang base sa search warrat nga ginpapanaog ni Judge Ignacio Alajar sang RTC Branch 18 sa syudad sang Roxas.
Nahibaloan nga boluntaryo naman sini nga ginpresentar sa mga kapulisan ang isa ka unit sang .45 caliber pistol, duha ka magazine kag 22 ka mga bala.
Suno sa impormasyon, ginpapanaogan ini sang search warrant bangud man sa reklamo sang pila ka mga residente sang pagpalupok sa tion nga mahubog.
Sa subong yara na ang amo nga kapitan sa kustodiya sang CIDG- Capiz.
Magapangatubang sang kaso nga pagbayolar sa RA 10591 ukon Comprehensive Law on Firearms and Ammunitions Regulation Act si Kapitan Jonathan Lopez Escorpion.
