Gipaklaro ni Col. Romeo Brawner, Jr., commander sa 103rd Infantry Brigade, Philippine Army nga naka-base sa Marawi City, nga dili ‘reward’ o ‘junket’ ang iyang pagkuyog kang Presidente Duterte sa Japan.
Sa usa ka viber message kagahapon sa buntag, miingon si Brawner nga kauban siya sa opisyal nga delegasyon sa presidente tungod kay gidapit siya isip resource person, kinsa maoy mo-istorya kabahin sa security and peace and order sa Marawi City ug sa Lanao del Sur.
Nagtoo si Brawner nga importante sa gobyerno sa Japan ang mahibaw-an ang estado sa seguridad sa lalawigan tungod sa bilyones nga kantidad sa investment nga ibubo sa gobyernong-Hapom didto.
Niadtong nakalabay’ng tuig, nagpirmahay og kasabutan ang gobyerno sa Japan ug sa Pilipinas aron himoong pormal ang paghatag og 2-billion yen nga ayuda alang sa rehabilitasyon sa Marawi City.
Lakip sa tibook jurisdiction ni Brawner ang Lanao del Sur ug Marawi City busa mas aduna siyay dakung kahibalo nga mosulti kabahin sa maong dapit.
Nahimong spokesperson si Brawner sa Joint Task Force Marawi samtang nagpadayun ang giyera sa Marawi sa tuig 2017.
Human ma-deactivate ang JTF Marawi, gibutang siya nga Regiment commander sa Civil Militaro Operations sa Armed Forces of the Philippines. (Divina M. Suson)
