Army confidential agent nga nakapatay sang police Victorias pasakaan kaso nga murder, frustrated murder

1828

VICTORIAS CITY, NEGROS OCCIDENTAL – (UPDATE) Naka half mast sa karon ang bandera sa city hall sang Victorias City bilang pagrespeto sa kamatayon sang isa ka pulis nga natiruhan sang isa ka army confidential agent las 5:30 kahapon sang hapon sa amo nga ciudad.

Ginkilala ang biktima nga katapo sang Victorias City Police Station nga amo si SPO2 Antonio “Tata” Broce, 43 anyos ang edad, kasado, may isa ka bata kag residente na sang Brgy. 21, ciudad sang Victorias apang pumoloyo gid sang San Carlos City.

Nakilala naman ang suspek nga amo si Richard Artagame, 43 anyos ang edad, army confidential agent, empleyado sang National Grid Power Corporation kag pumuluyo sang Brgy. Alicante, banwa sang EB Magalona.

Suno sa imbestigasyon, ang suspek nga si Artagame ang nagpadulong sa Victorias agud nga sukton ang isa ka barangay tanod sang ginkuha niya nga inugbulang nga manok nga nakilala naman kay Edgar Saludes, 43 anyos, pumuluyo sang amo nga barangay sa Victorias.

Apang, gin-alegar ni Artagame nga nagdalagan ini sang nagkitaay sila rason nga napilitan siya nga tiruhon ini kag naigo sa tiyan.

Ginpahayag nga nakapangayo pa sang bulig ang tanod sa biktima nga si SPO2 Broce gani bisan pa nga day-off sang pulis, ini siya ang nagkadto sa lugar kag nagresponder.

Sa pag-abot sa lugar, nakita ni Broce ang suspek nga may hostage nga babaye kag didto na gulpi nga gintiro ni Artagame ang pulis kag naigo sa iya dughan kag naglapos sa likod nga amo naman ang gintunaan sang iya kamatayon.

Suno sa asawa sang biktima nga si Julie Broce, ang iya bana isa ka mabinuligon nga tawo kag amo ang masami nga ginapalapitan kag ginapangayuan sang bulig sa tagsa ka may kinagamo nga magluntad sa ila lugar.

Si Saludes ang ara karon sa Corazon Locsin kag ginabulong.

Suno naman kay PCInsp. Eduardo Corpuz nga kaso nga murder kag frustrated murder ang ipasaka kontra kay Artagame./dyHB BACOLOD

Facebook Comments