Nasigmuyu si BGen. Franco Nemesio Gacal, brigade commander sa 402nd Brigade Phil. Army sa bugnaw nga suporta sa local nga kagamhanan sa Agusan del Norte ug Surigao del Norte sa pagsumpo sa problema sa insurhensya sa lalawigan tungod kay pipila sa mga opisyal ang nagsuporta usab sa rebelding New Peoples’ Army (NPA). Gibutyag ni BGen. Gacal nga adunay barangay ubos sa iyang area of responsibilty nga ang kinatibuk-ang barangay council mismo ang misuporta sa mga NPA. Alang sa opisyal nga hangtud lig-on ang masa sa mga lugar nga anaa ang simpatiya sa NPA magpadayun ang pagpanghasi sa mga rebeldi ug makaapekto sa kahusay ug kalinaw sa tibook rehiyon. Daghan usab nga mga barangay peace and order council ang wala mag-convene hinungdan nga napasagdan ang kahimtang sa seguridad sa lugar. Kining tanan giisip sa opisyal nga dakung hagit sa goberno ug dili lang sa Armadong Kusug sa Pilipinas. Gikompirma ni PCI Renel Serrano, spokesman sa Police Regional Office 13 nga adunay mga Mayor sa kalungsuran dinhi sa Caraga region nga nag-doble kara sa pagsuporta sa rebelding New Peoples’ Army (NPA). Kini nga impormasyon nga gipaabot sa PNP ang nagkatakdu sa unang gibulgar usab ni BGen. Franco Nemesio Gacal, sa 402nd Brigade Phil. Army. Sigun ni PCI Serrano nga kung ang mga opisyal sa PNP maoy maatubang sa mga Mayor mosaad sila ug suporta apan susama nga pasalig usab ang ilang ihatag kung ang mga kumander sa NPA ilang maatubang. Aminado ang opisyal nga ang nag-unang rason nganong doble-kara ang mga Mayor gumikan sa seguridad. Apan nagdasig si PCI Serrano nga makig-alayon ang mga opisyal ngadto sa PNP ug AFP aron mahatag ang seguridad kanila. Sent from my Samsung Galaxy smartphone.
