Army: Salugpungan schools gihimong recruiting ground

38

Davao City – Gibarugan sa 1003rd Brigade Philippine Army nga nagsilbing recruiting ground ang mga tulonghaan sa Salugpungan Ta’tanu Igkanugon Learning Center Incorporated sa pag-recruit sa mga kabataang lumad aron mahimong sakop sa teroristang NPA.

Subay kini sa mga nakalap ug nahipos nga mga ebidensya ug testimonya gikan sa pipila ka kanhing mga estudyanteng lumad sa Salugpungan kansang kaulahian nisampa sa NPA gumikan sa mga pagpanudlo nga gihatag ngadto sa mga estudyante, matud ni Brigade Commander Col. Nolasco Mempin sa Task Force Davao.


Nagpadagan og mga eskwelahan ang Salugpungan sa kabukiran nga walay permiso gikan sa Department of Education 11 diin ang mga curriculum nga gitudlo ngadto sa ilang mga estudyante wala masubay sa curriculum sa ahensiya sama pananglitan sa pag-usab sa linya sa nasudnong awit.

Ug tungod niini, ang DepEd Davao Region nakakita og kalapasan ug pupaigo na nga basehan aron hingpit imando ang pagpasirado sa tanang eskwelahan sa Salugpungan nga nag-operate sa pipila ka bahin sa rehiyon onse.

Gitindugan ni Mempin nga dili rebelyon kun pagsampa sa NPA ang sulbad sa mga problema sa pilipinas karon ug sa kalisdan nga nasinati sa katawhang Pilipino diin mao kini nga leksyon ang angay hinuklugan ug palandungan sa tanan.

Anaa na karon sa DepEd ang responsibilidad sa pagmonitor sa mga NGO nga magtukod og mga tulonghaan sa lagyong dapit aron masiguro nga makontrol ug anaa sa ilang supervision ang mga eskwelahan nga tinu-kod sa mga pribadong organisasyon ug maingon man sa curriculum nga ilang ginatudlo sa mga kabataan.

RadyoMaN Joel Viray

Facebook Comments