Nagpakita naman sang pagka-arogante ang isa ka staff sang West Visayas State University Medical Center.
Mismo si Board member Manny Gallar ang ginpaagyan sang ka-arogante sang isa ka intern nga nagahingalan kay Cyrelle Pineda.
Suno kay board member Gallar nga nagpadulong sila sa WVSU medical center sang nagligad nga adlaw agud pabakunahan sang anti-tetanus ang isa ka capitol employee kon sa diin may dala na sila nga tetanus toxoid.
Subong man, natingala lamang si board member Gallar nga ginasukot siya ni Pineda sang 500 pesos nga bayad para sa pagbakuna sa pasyente apisar may dala na sila nga vaccine.
Bangud indi maributay, gintuyo ni Gallar nga kilalahon ang babaye nga nagasukot sa iya sang 500 pesos kag daku ang iya kakibot sang arogante ini nga nagpakilala nga si Cyrelle Pineda nga intern.
Gilayon nga ginpalab-ot sang board member sa tagdumalahan sang ospital ang natabu kon sa diin ginpanugyanan siya nga magsumiter sang incident report agud maaktuhan ang nasambit nga insidente.
