Gidungap patay ang usa ka 24 anyos nga asawa sa Barangay Tugunon dakbayan sa Danao alas 3:00 kaganihang kadlawn .
Ang biktima giila nga si Loren Capuyan residente sa nahisgutang lugar samtang ang suspek mao ra usab ang iyang bana nga si Romel Capuyan 26 anyos.
Matud ni PO2 Badet Limpag sa Women’s desk sa Danao City Police Station , nga tulo ka adlaw nga nilakaw ang suspek ug wala mopauli sa iyang pamilya .
Sa wala pa mahitabo ang insidente naka text pa ang suspek ngadto sa iyang asawa nga tubagon ang iyang tawag sa cellphone, apan gusto sa asawa nga si Loren nga papaulion ang iyang bana aron sila personal nga magka estorya.
Asoy ni PO2 Limpag nga sa dihang nipauli na ang bana, nakasulti kini sa iyang asawa nga naka dispalko kini og P 18,000 nga kwarta sa kompanya nga iyang gitrabahuan .
Gusto masayud sa biktima nganong naka dispalko og kwarta ang suspek nga unta wala man kini maghatagan sa iyang sweldo alang sa iyang pamilya.
Nasayran sa suspek nga nahalinan diay og baktin ang iyang asawa og buot niini nga manghuwam og kwarta aron ikabayad sa nadispalko niining kwarta .
Apan nagdumili ang biktima paghatag og kwarta hinungdan sa ilang mainitong panaglalis nga niresulta sa pagpanunggab.
Naka angkon og lima ka samad dinunggaban ang asawa sa iyang buko-buko samtang usa sa liog hinungdan sa kamatayun niini.
Ang suspek natanggong na karon sa Danao Police Station.
