Ginpadakop sang 32-anyos nga bana ang iya asawa kag kerido sini matapos iya Makita nga nagsulod sa isa ka lodging house sa distrito sang Lapaz.
Priso karon sa Lapaz Police station ang asawa kag ang lalaki nga kaupod sini nga gindakop sa sulod sang lodging house.
Ginpahayag sang bana nga duha ka tuig na niya nahibaluan nga may lalaki ang iya asawa apang subong lamang niya nakumpirmar matapos makita nga nagsulod ang mga ini sa lodging house.
Samtang ginpahayag ni Police Master Sgt. Venus Gabawa sang Lapaz PNP nga nagpangayo sang bulig sa ila ang bana nga nasundan sini ang iya asawa nga may upod nga lalaki nga nagsulod sang lodging house.
Gilayon naman nga nagresponder ang mga pulis kag ginsulod sa kuwarto ang duha kag gindakop.
Kaso nga adultery ang paga-atubangon sang asawa kag lalaki sini suno kay gabawa.
Samtang wala sang pangduha-duha nga gin-ako sang asawa nga nag-upod ini sa lalaki nga iya nakilala sa facebook bilang balos man sa ginahimo nga pagpanginbabaye sang iya bana.
Ginpanindugan sang babaye nga handa niya atubangon ang consequensia sang iya ginhimo.
Suno sa iya nga wala na sang sabor ang ila pag-upod nga mag-asawa kabangdanan nga nangita man siya sang lalaki nga iya maluyagan.
Suno sa iya nag-umpisa ang paglas-ay sang ila relasyon nga mag-asawa sang ginapasibangdan siya sini nga may lalaki kag sa pagkamatuod, ang iya bana amo ang may babaye.
Suno sa iya nga sini lamang siya nagpatol sa lalaki bangud plano naman niya magbulag sa iya bana.
