TACLOBAN CITY – Bag-o nga nawong ha larangan han politika an nagfile han Certificate Of Candidacy (COC) pagka-representative han 2nd district han Leyte ha Kongreso.
Hiya hi Karen Lolita Javier, 43 anyos, an iya kandidatura in ilarom han Partido Federal ng Pilipinas. Hiya an asawa ni Javier, Leyte Mayor Leonardo Javier, founder ngan owner han Andok’s Corporation, sikat nga ngaran tungod han famous roast chicken ngan mayada mga outlets nationwide.
Gin-updan hi Karen han myembro han iya pamilya, Leyte Governor Leopoldo Dominico Petilla ngan pira nga myembro han maimpluwensya nga Petilla Clan, provincial board members, An-Waray Party-list officials ngan mga alkalde han probinsya.
Sumala han pamahayag ni Karen, kun hiya in magdaog magpofocus hiya ha livelihood programs para ha mga kababayin-an ngan mas papakusgon an mga programa ha panlawas.
Dugang ha pamahayag ni Karen, nagdesisyon hiya nga dumalagan pagka-Congresswoman tungod han araba han mga Mayors tikang ha ikaduha nga distrito nga mayada 14 nga bungto.
Iya makakabangbang ha eleksyon hi Re-Electionist Incumbent Rep. Henry Ong. Hi Ong in madalagan ha ilarom han PDP-Laban Party.
Pira nga Mayors gihapon an sumuporta ngan gin-updan hi Ong pagfile han iya kandidatura dida han nakalabay nga semana pero sumala kan Karen, kasabot daw han mga alkalde in diri hiya madalagan pero yana nga opisyal na hiya nga kandidato in ginsuportahan hiya han pira nga Mayors han bungto han ikaduha nga distrito.
Sumala naman han pamahayag ni Ong, andam hiya atubangon kun hin-o an iya makakalaban ha politika.
