Davao City – Gikumpirmar karon sa City Veterinarian’s Office nga nagpositibo sa African Swine Fever (ASF) ang mga barangay sa Dominga ug Lamanan, Caliann subay sa nahimong resulta sa samples nga gikuha gikan sa mga baboy nga naigo ug namatay sa mao nga balatian.
Matud ni City Veterinarian’s Office Chief Dr. Cerelyn Pinili, gipa-ubos na sa surveillance ug monitoring ang mga purok sa nasangpit nga mga barangay nga nakasulod sa seven or ten-kilometer radius ug may gi-montar na usab nga mga quarantine checkpoints.
Gi-lockdown na ang nasangpit nga mga barangay sa tumong nga mapunggan ang pagkuyanap sa ASF sa kasikbit nga mga barangay diin walay mga buhi o karneng baboy nga tugtang makagawas ug makasulod sa area ilabi na kadtong anaa sa one-kilometer radius nga ipailawom sa ‘depopulation by culling or cleansing.’
Segun ni Pinili, ilang nadiskubrehan nga ang ASF sukad pa niadtong ikaduhang semana sa bulan sa January human adunay nangayo og tabang sa livestock technician sa City Vet gumikan kay kalit nagluya ang mga baboy.
Sumala ni Pinili, duha ka sample ang gikuha sa mga baboy sa Dominga ug unom sa Lamanan ug dayon gipaubos sa laboratory test ug nagsuta nga nagpositibo sa ASF ang nasangpit nga mga samples.
Nasuta nga mokabat sa 1,400 ka baboy ang gibuhi karon sa mga residente sa Barangay Lamanan samtang 600 ka baboy usab sa Barangay Dominga diin ang tanan gi-quarantine na ug gikatakdang ipailawom sa ‘culling procedure’ kun cleansing or segregation.
Ang City Vet nangita na karon og burial site alang sa kapin 2,000 ka mga baboy nga naa karon sa duha ka mga barangay sa Ikatulong Distrito ning siyodad.
Sumala ni Department of Agriculture (DA-XI) Regional Director Ricardo Oñate, Jr., dili pa nila matumbok ang rason nganong nakasulod sa rehiyon ang ASF apan ang teoriya mao nga may dakung posibilidad nga ang virus nakuha sa mga baboy nga nikaon sa salin nga mga pagkaon kun lamaw niadtong sa nakalabay’ng Pasko ug Bag-ong Tuig.
Giingon ni Onate nga dili angay mabalaka ang mga hog raisers tungod kay paliton sa gobyerno ang ilang mga baboy sa kantidad nga P5,000 kada ulo niini ug samtang paliton usab sa kagamhanang lokal ang ilang mga binuhing baboy.
Gawas sa paglusad og livelihood program, ang rehiyonal nga buhatan sa mga lugar nga naigo sa virus molihuk usab aron makapadayon gihapon sa panginabuhi ang katawhan nga naapektaran sa ASF.
RadyoMan Joel Viray
