Sarangani Province- Gikalipay karon sa probinsya sa Sarangani ang pagkapili sa Lamlifew *(lam-li-faw)* Tribal Women’s Association nga masulod isip finalist dili lang sa usa kundili sa duha ka mga dagkong institusyon sa Pilipinas.
Sila ang kahugpungan sa mga babaeng Blaan nga maoy nagdumala sa inila na nga Lamlifew Village Museum nahimutang sa Barangay Datal Tampal sakop sa lungsod sa Malungon.
Napilian sila sa sikat nga “Lopez Achievement Award”. Gikan sa nahabiling trayntay-singko (35) ka entry, nahimo na lang sila karon nga onse (11) kabuok entiro nasud, og karong bulan sa Oktubre mahibal-an kinsa ang pinal nga mudaog. Nisaludo ang organizer sa Lopez Achievement Award tungod kay anaa matud pa sa Lamlifew Tribal Women Association ang story of transformation, story of leadership, og empowerment sa mga kababaihang lumad.
Segun ni Celito “Toto” Terando, ang nangulo sa Sulong Tribu program ilalum sa buhatan ni Governor Steve Chiongbian Solon, gikan sa One Hundred Thousand Pesos (P100k) nga income matag tuig sa Lamlifew Tribal Women’s Association, ni-alsa na kini karon sa halos napulo (10) ka pilo. Ang mga myembro sa asosasyon ang elementary og high school graduate apan ga-income sila daw mga professional.
Dili susamag Boracay ang view nga makita sa Lamlifew Village Museum apan makita sa sulod ang tinuod nga cultural og tribal experience, hilabi na ang mga kasuotan og tela nga hinulma og ginama mismo sa mga maalamong kamot sa mga Blaan weavers. Apil nga makita ang mga antik nga mga kagamitan sa mga indigenous people.
Gideklara nga pinakauna nga village museum entiro Pilipinas ang Lamlifew Village Museum, og usa kini sa mga hinungdan nganong daghang lokal og langyaw nga mga turista ang gabisita sa Sarangani Province.
Samtang, gawas sa Lopez Achievement Award, napilian pud ang Lamlifew Tribal Women’s Association nga apil sa baynte (20) ka mga social enterprises sa tibuok Pilipinas sa “Sinag Awards” nga gi-organisa sa B.P.I. kon Bank of the Philippine Islands. Ang mapilian karong bulan sa Nobyembre ang makaangkon og suportang pinansyal og teknikal aron mulambo pa ang kahugpungan.
Nagpadayon lang ang pag-ayuda sa lokal nga gobyerno gipangunahan ni Governor Solon kauban sila Senador Manny og Congressman Ruel Pacquiao, Vice Governor Elmer De Peralta, mga board member og mga mayores aron ma-preserba og ma-protektahan ang kultura sa mga kaigsoonang lumad, at the same time, matagaan sila og lig-on nga panginabuhian og ang kinatibuk-ang kalambuan. (Photo by Kim Tiblani)
