Assistant City Engineer han Calbayog City, Samar ginpamumusil, patay

614

Calbayog City, SAMAR – Ginpamumusil patay han diri pa makilal-an nga mga suspek an Assistant City Engineer han Calbayog City Engineering Office ha Navarro St. Brgy. East Awang Calbayog City, Samar kanina han alas 8:25 han aga.

Basi ha report tikang ha Samar Police Provincial Office, ginkilala an Asst. City Engineer nga hi Rafaelito Fuertes Serrano Alyas “Joker”, 50 anyos, may asawa ngan residente ha nasabi nga lugar.

Ha inisyal nga imbistigasyon han mga otoridad, nagmamaneho an biktima sakay han single nga motor ngan tigda nga umabot an mga suspek sakay gihapon han single nga motor ngan ginpamumusil na an biktima ha ulo nga parte han iya lawas.

Nadara pa ha hospital hi Joker pero dead on arrival na ini.

Nagpaharurot tigda hin dalagan an mga suspek pero nakuhanan han CCTV camera an nahinabo nga krimen kun diin nakit-an nga nakasul-ot hin kulay pula nga polo ngan may tahob nga facemask an driver nga suspek samtang an backrider naman in nakasul-ot hin busag nga kalo.

Padayon an imbistigasyon han mga kapulisan agud mabaruan kun ano an hinungdan han krimen ngan kun hin-o an mga suspek.

Facebook Comments