Unang myembro sa gabinete ni Pangulong Rodrigo Duterte nga nibisita human sa May 13, 2019 Election mao mismo ang assistant secretary sa Climate Change Commission nga si Assistant Secretary Romell Antonio Cuenca.
Si Asec Cuenca ang nanguna sa pag-abri sa lima (5) ka adlaw nga CEDRA kon Climate Change and Environmental Degradation Risk and Adaptation Assessment og Greenhouse Gas Inventory Workshop nga gi-organisa sa Provincial Climate Change Office, walay laing tinguha kundili ma-pulido ang pagkamugna sa provincial og municipal climate change action plan sa Sarangani Province, mapangandaman og sakto ang mga buhatunon sa gausab-usab nga klima.
Wala palagpasa ni Assistant Secretary Cuenca nga daygon si Governor Steve Chiongbian Solon tungod kay ang Sarangani matud pa ang unang probinsya sa tibuok Pilipinas nga nakakuhag pondo balor og P103 Milyones ka pesos gikan sa People’s Survival Fund para sa dakong proyekto nga mao ang flood control og watershed ecosystem rehabilitation alang sa dakong sapa sa lungsod sa Maitum nga mao ang Saub River. Dili tiaw ang rekositos aron maka-access sa maong People’s Survival Fund sa nasyonal nga gobyerno apan kini ang nakaya sa Provincial Government sa Sarangani.
Samtang, human sa pagbisita ni Asec Cuenca, sunod nibisita si Doctor Roy Ferrer, ang presidente og chief executive officer sa Philhealth entiro Pilipinas. Una pa kini niluwat sa katungdanan, nibisita sya sulod sa Sarangani Provincial Hospital, og iyang gikumpirma nga apil ang Sarangani Province isip pilot area sa tibuok Pilipinas nga unang maka-benipisyo sa balaod nga gipirmahan ni Pangulong Duterte kabahin sa Universal Health Care.
Buot pasabot niini, makadawat og Special Health Fund ang Sarangani Provincial Hospital gikan sa Department of Health aron madugangan ang gidaghanon sa doctor, nurses og mga kagamitan, og makatagamtam ang mga katawhan sa gipadak-an pa nga benipisyo sa Philhealth. Philhealth-accreditted na ang Sarangani Provincial Hospital, sa pagsuporta nila Senador Manny og Congressman Ruel Pacquiao, Vice Governor Elmer De Peralta og mga board member.
Una nang namuntar bag-uhay lang sulod sa Sarangani Provincial Hospital ang Philhealth Service Desk nga nagsilbing satellite o extension office. Pwede ng dili muadto sa Philhealth-Gensan tungod kay ang maong Philhealth Service Desk sa Sarangani Provincial Hospital ang muhatag na sa halos tanang serbisyo, sama sa pag-proseso sa MDR kon member data record, Philhealth ID, ang buot magpa-myembro, magpa-update sa ilang dependents, og ang magpaklaro pa sa ilang Philhealth claims.
Giangkon sa Philhealth nga sa tibuok Rehiyon Dose, ang Provincial Government sa Sarangani ang may pinakadakong budget matag tuig alang sa pagpa-enrol sa mga indigent ngadto sa Philhealth, mukabat sa Onse Milyones ka pesos (P11M) ilalum kana sa Sulong Kalusugan program ni Governor Solon, wala pay apil ang alokasyon gikan sa mga mayores sa mga munisipyo.
