Davao City – Luwas gikan sa pagpangrecruit sa New Peoples Army (NPA) ang mga kabatan-onan sa tribung Ata nga nagpuyo sa may Paquibato District ning syudad.
Kini mao ang giseguro sa Ata youth leader nga si Bob Ali atol sa gipahigayong Kapehan sa Dabaw karong adlawa diin siya miingon nga daghan ang makitang sundalo sa ilang dapit.
“Lugar man gyod ni sa atong presidente so bantayan gayod ni niya,” segun ni Ali.
Gawas sa military force, gibutyag sa maong youth leader nga dili daling madala ang mga Ata sa pikas grupo gumikan sa ilang kusog nga pagpaila sa matag batan-on sa ilang tribu pinaagi sa Panuluanan (Tudluanan), usa ka tulunghaan diin asa magkat-on ang mga batan-on sa pagpakusog sa ilang kultura ug tradisyun.
Gani, plano sa ilang grupo nga mas padaghanon pa ang Panuluanan sa tibuok 13 ka mga barangay sa Paquibato District.
Sa pikas bahin, giimbitahan ang mga Dabawenyo nga mobisita sa Binanwa House, usa sa pipila ka mga architectural tribal house sa nagkadaiyang tribu nga nag-estar karon sa Magsaysay Park nga pagaablihan karong Marso 15 hangtod 18 atol sa pagsaulog sa ika-81st Araw ng Dabaw.
RadyoMaN Jason Amisola
