BREAKING NEWS – Gintiro sang riding in tandem ang isa ka abogado pasado las 11 sini gid lamang nga udto sa area malapit sa corner Galo BBB/Lopez Jaena Street, Bacolod City.
Ang biktima nakilala kay Atty. Rafael Atutubo, 65 anyos, residente sang Talisay City.
Suno kay Bacolod City Police Director PSSupt. Francisco Ebreo nga si Atty. Atutubo may patal nga igo sang bala sa iya wala nga mata (ibabaw sang kilay) nga gindala pa sa Bacolod Doctor’s Hospital apang gindeklara nga dead-on-arrival mga las 11:32 subong nga udto.
Base naman sa pahayag sang mga saksi nga may duha ka suspek sakay sa motorsiklo (Black Kawasaki Rouser) ang nagdulog sa lugar nga naga serbe opisina ni Atty. Atutubo para sa iya pagpang-notaryo. Ang angkas nakabonet kag nakajacket apang kag nakahelmet naman ang driver.
Nakibot ang mga tawo nga yara sa palibot sang hinali na lamang sila nakabati sang kapin duha ka lupok kag sunod nga nakita amo na ang pagkatumba sang abogado nga duguon, samtang nagapungko ini sa bangko sa idalom sang tarapal, guwa sang iya ginarentahan.
Si Atty. Atutubo ang sikat sa pagbulig sa mga drug suspects.
Sa karon padayon ang pursuit operation sang Police Station 4 para malagas ang mga suspek nga nagdalagan padulong sa west nga direction sang Galo Street ka ginpaalarma naman ang tanan nga natungdan nga estasyon sang pulis sa posible nga presensya sang mga suspek sa ila area of responsibility.
