Davao City – Mikunhod ang ihap sa kaso sa dengue sa Davao Region sa bulan sa Agosto itandi sa milabay’ng bulan sa Hulyo.
Kini mao ang gibutyag ni Engr. Antonietta Ebol, Dengue Prevention & Control Program Coordinator sa Department of Health (DoH) 11, diin matud pa anaa sa 27% ang reduction of case sa maong balatian.
Sa datos sa DOH-XI, miubos sa 993 ka mga kaso ang natala alang sa bulan sa Agosto diin dunay 6 ang namatay gikan sa 1,264 ka mga kaso sa bulan sa Hulyo diin 15 ang natalang patay.
Apan sa kinatibuk-ang datos gikan Enero hangtod Agosto karong tuiga, misaka sa 60% ang kaso sa dengue gikan 3,467 diin 17 ang patay sa tuig 2018 ngadto sa 5,566 ka mga kaso diin 30 ang patay sa tuig 2019 diin ang Davao City ang dunay pinakataas nga kaso sa dengue nga dunay natalang 2,968 cases, gisundan sa Compostela Valley nga dunay 897, Davao Oriental dunay 763, Davao del Norte dunay 673, Davao del Sur dunay 225, ug Davao Occidental nga dunay 40 ka mga kaso.
Sa pagkakaron duna nay ginabuhat nga assessment sa dengue preparedness response ang DOH-XI ngatdo sa komunidad.
Segun sa maong opisyal, lauman usab moabot ang 3,000 dengue kits karong semana ingon man insecticides sa mosunod nga semana alang sa mga moskiteros ug kurtina.
Samtang mobisita ang pipila ka personahe sa Central Office sa Setyembre 5 aron i-assess ang DOH Regional Office, mga ospital, health centers, daycare centers, skwelahan lakip na ang mga pamiya diha sa komunidad.
Gi-awhag ni Ebol ang komunidad nga kanunay manglimpyo ug mupartisipar sa 4 o’clock habit ilabi na sa kanal nga sagad barado sa mga basura gani kawsa sa pagdaghan sa mga lamok.
RadyoMaN Jason Amisola
