Australian National nagpasalamat sa tricycle driver sa Surigao City na nag-uli sa ija wallet
Dako an pasalamat sa isa ka Australian National human na tag-uli sa tricycle driver sa Surigao City an nabilin nija na wallet.
Tagpaabot ni Peter Eicas, 61 anyos, Australian National ug temporaryo na naghuya sa Lanuza, Surigao del Sur an pasalamat ngadto sa tricycle driver na si Junrey Lucero human na tag-uli an ija wallet na kumpleto pa an suyod pareho sa P1,000 na kuwarta lakip an pipila ka credit cards, driver’s license ug Australian Medicare health card. Tagtudlo sa langyaw na nabilin nija an wallet sa dihang nosakay sa tricycle ug nagpahatud sa isa ka hotel sa Km. 2, National Highway.
Sa pagkakita sa driver na si Lucero na may nabilin na wallet suyod sa ija tricycle, ija pa tagbalik sa hotel pero waya nahilista sa pangayan ni Eicas an pag-check in ugsa na diretso na lamang sija na mikadto sa police station. Didto sa City PNP nadiskubre niini na una na nagpatala si Eicas sa nawaya an ija wallet ugsa na an investigator na si SP01 Cesar Johans Castillo an mikontak sa nawad-an na Australian National.
Didto na sa City PNP nahitabo an panagkita sa duha ug an tag-turn over nan wallet. Sa kalipay ni Eicas sa pagka-uli sa ija wallet, taghatagan nija nan pahalipay an driver na si Lucero.
