General Santos City—Kritikal ang usa ka ginang human nga gimartilyo sa iyang bana samtang patay usab ang suspek human kining naghikog sulod mismo sa ilang panimalay sa may Zone 2, KPS, Barangay Labangal, Gensan alas 10:00 ang takna sa buntag kagahapong adlawa.
Giila ang ginang nga si Maricel Eliver, legal age, samtang giila usab ang bana niini nga si Joel Eliver, 55 anyos, pulos residenti sa nasampit nga lugar.
Sa inisyal nga imbistigasyon sa Police Station 2 nasayran nga ayha nahitabo ang insidenti, nag-away matud pa ang magtiayon nga misangko sa pagpamunal ug martilyo sa bana sa iyang asawa.
Gitabangan sa mga silingan ang biktima nga madala sa ospital human nga nakapangayo pa kini ug tabang. Samtang pila ka minutos ang nakalabay nakaplagan nalang ang bana nga nagbitay na sulod sa ilang panimalay human kining naghikog.
Selos ang usa sa hinungdan nga gitutukan sa kapulisan sa pagmartilyo sa bana ngadto sa iyang asawa.
Sa karon nagpadayon ang gihimong imbistigasyon sa kapulisan kalabutan sa maong insidenti.
