General Santos City– Blangko ang live-in partner sa gwardya nga si Christopher Bedico, gwardya sa luna nga gipanag-iyahan sa pamilyang Pendatun ug residente sa Purok Paglangan, Barangay Apopong, Gensan sa pagpamusil ngadto sa iyang kaipon.
Sumala pa sa ginang nga nakurat nalang sila kagahapong adlawa dihang gipusil ang nasangpit nga biktima samtang kini nagpakaon sa iyang binuhing manok.
Nasayran nga nagpakaron-ingnon pa ang mga suspetado nga kustomer sa ilang tindahan diin mipalit pa kini ug sigarilyo apan kalit lang nga mibunlot ug pusil dayon gipusil ang biktima igo sa iyang lawas nga hinungdan sa iyang kamatayon.
Dugang pa sa Ginang nga wala gyud siya masayod sa rason nganong gipusil ang iyang kapuyo.
Iyang gihingusgan nga wala may nakalaban ang biktima ayha pa nahitabo ang pagpamusil.
Apan sa kabahin sa kapulisan, Land Conflict kon away sa luna ang usa sa mga anggulong gitutukan sa Police Station 2 kalabutan sa pagpusil patay kang Bedico.
Matud ni Police Major Ananiaz Vasquez, Hepe sa Police Station 2, ang away sa yuta ang usa sa mga pinakaduol nga anggulo sa maong krimen.
Apan wala usab nila gibalewala ang uban pang anggulo nga posibleng hinungdan sa pagpatay niini.
Sa karon nagpadayon pa ang ginahimong imbestigasyon sa kapulisan kalabutan sa maong insidente.
