Davao City – Usa ka babae ang nakuhaan og dakong kantidad nga kwarta human nailad sa duha ka wa mailhing suspek.
Base sa blotter report sa Sta. Ana PNP, ang biktima mao si Lykha Ando, 23 anyos nga taga Purok 15 Barangay Wangan Calinan.
Ang insidente nahitabo bandang ala 1:36 sa hapon didto sa dalang Ramon Magsaysay Avenue ning dakbayan.
Matud pa sa report ang biktima kalit giduol sa duha ka suspek kinsa nangayo og tabang sa pagpangita og sakyanan nga marintahan.
Samtang naglakaw ang biktima kauban ang mga suspek gioperan kini nga ibilin usa ang ilang kwarta nga mukantidad og 25,000.00 nga giputos ug panyo.
Human niini, nidemand ang suspek ngadto sa biktima nga muhatag kini og kwarta sa kantidad nga 10,500.00 pesos bugti sa kuwarta nga iyang gibantayan.
Sa dihang nakalakaw na ang duha ka suspek nadiskubrehan nalang sa biktima nga ang giputos nga panyo puro papel ang sulod.
Human sa hitabo ang biktima nga si Ando igo nalang sa pagdangop sa Sta Ana Pnp aron ipa-blotter ang insidente.
RadyoMaN Don Pulayao
