Davao City – Grabeng kasuko ang gibati sa mga silingan sa nahitabong pagpaluhod sa usa ka lalaki nga nailang si Tata sa iyang gikabangi nga si Dondon sa Brgy. Lasang, Davao niadto lamang adlawng Miyerkules nga miresulta sa kamatayon sa mibadlong sa insidente nga giilang si Indang Gabronino.
Sa report nga gipaabot sa DXDC RMN Davao ni alyas Lea, silingan sa biktima, gibutyag niini nga nahitabo ang insidente sulod sa basketball court sa Purok Scorpio, Sitio Bucana, Brgy. Lasang, ning syudad diin mikatag pa sa social media ang panghitabo.
Saysay ni Lea nga gi-videohan pa sa nahisgutan ang pagpalakaw pinaagi sa pagluhod ang lalaki apan sa dihang gi-atake na ang giilang si Indang, gi-delete kini sa nahisgutan ug nanibat.
“Kadtong nag-video sila, nag live sila. Karon, kadtong live nila mao toy taas-taas kaayo, kay kapila man daw to nila gipabalik-balik diha sa court. Karon, kapila na daw to nila gipabalik-balik, gipasinggit-singgit. Karon, pagkabalo nila nga namatay si ante Indang, ilahang gi-delete,” saysay ni Lea.
Giingon nga nakaabot na kini sa barangay ug gikatakdang pakasohan ang mga sad-an labot sa ilang gibuhat.
RadyoMaN Kirby Manzon
