General Santos City—Padayon ang gihimong imbestigasyon sa Polomolok Municipal Police Station kalabutan sa nahitabong robbery hold-up sa National Highway, Polomolok, partikular sa Brgy. Glamang.
Giila ang biktima nga si Quennie Soberano Beltran, 39 anyos, minyo, self-employed ug residente sa Block 3, Purok Bagtindon, Brgy. Magsaysay, Polomolok, South Cotabato.
Subay sa sumbong sa biktima sa Polomolok Municipal Police Station ala 1:00 ang takna sa nakalabyang adlaw nahitabo ang pagpanulis samtang kini sakay sa iyang motorsiklo nga Yamaha Mio, color itom ug maroon, padulong sa East West Bank Pioneer Avenue, General Santos City aron unta mo-deposit ug kwarta.
Sumala pa nga kalit lang gihunungan siya sa mga suspek nga nakasakay sa Honda XRM 125, color itom ug puti nga walay plate number. Kalit matud pa nga mibunlot ug pistol ang suspek dayon siya gitiunan sa ulo dungan sa pagdeklara ug tulis.
Giilog sa mga suspek ang ang iyang sling bag nga may sulod nga kwarta nga nagkantidad ug P52,000.00 ug usa ka Huawei nga cellphone ug uban pang mga dokumento.
Human sa pagpanulis, misibat ang mga suspek paingon sa General Santos City. Sa karon, gipahigayon pa sa kapulisan ang operasyon aron sa pagdakop ug pag-ila sa mga suspek sa maong insidente.
