General Santos City–Hoyhoy ang abaga sa usa ka ginang nga midangop sa kwerpo sa kapulisan aron magpakitabang sa nahitabo kaniya human kining gikawatan sa duha ka wala mailhing suspek nga pulos mga babaye.
Sa report nga nahagpat sa RMN Gensan News Team, gikan sa Fatima Police Station naila ang biktima nga si Analyn Peque, 36 anyos, minyo, residente sa Prk.17-A, Lanton, Brgy. Apopong Gensan.
Nasayran nga basi sa inisyal nga imbestigasyon sa kapulisan nakit-an ang biktima alas 10:25 sa buntag pinaagi sa CCTV camera nga gimontar sa usa ka merchandising nga nahimutang sa Employees Village brgy. Fatima, samtang busy sa pagpili-pili sa iyang palitonon kalit kining giduol sa duha ka kawatan ug gi-ablihan ang dala niining itom nga packbag.
Malampusong natangag sa mga kawatan ang kwarta sa biktima nga nagkantidad ug 14 mil pesos nga gisulod niini sa pouch ingon man ang mga importanteng dokumento.
Human sa panghitabo paspas nga misibat ang duha ka babaye sa wala matinong direksyon.
Naglaum na lamang ang biktima nga mailhan ug madakpan sa kapulisan ang mga suspek aron nga manubag sa balaod sa ilang gihimo ug mapriso.
Sa kasamtangan naghimo na ug makuting imbestigasyon ang Fatima PNP kalabutan sa maong insidente.
