General Santos City—Anaa sa talandugong kahimtang ang usa ka babaye nga nailang si Diana Majula, 45 anyos nga taga First Gate, Barangay Sinawal, Gensan human mabunal sa gahing butang ang ulo niini dihang nabangga sa barikada nga gibutang sa dalan padulong sa ilang lugar ang gisakyan niining motorsiklo.
Sumala ni Ariel Salcedo, nakabase sa Barangay Disaster sa Barangay Apopong kansa usa sa mga miresponde sa nahitabong insidente, alas 2:00 ang takna sa kabuntagon pauli na ang biktima sa ilang panimalay uban sa iyang mga kaubanan dihang aksidenteng nabanggaan nila ang barekada nga gimuntar sa giayo nga kalsada sa maong lugar.
Gumikan sa impact, nahagbong ang biktima sa gisakyan niining motorsiklo ug nabunal ang iyang ulo sa gahing butang.
Gilayong gidala sa Dr. Jorge Royeca Hospital ang biktima apan gibalhin sa pribadong ospital gumikan na usab sa talandugon niining kahimtang.
