Davao City – Kritikal ang kahimtang sa usa batan-on nga babae human gipusil ala-1:00 sa kaadlawon natigayon sa may Sto. Niño Chapel, Brgy. 5-A Bankerohan, siyudad sa Davao.
Subay sa report gikan San Pedro PNP, naila ang biktima nga usa ka Jacky Pasaporte Agad, residente sa Purok 17 Lower Madapo sakop nahisgutang barangay samtang usa sa suspect naila nga si alyas Aiman, walay kumpletong address.
Matud pa sa inahan sa biktima nga si Marlyn Agad, naglakaw iyang anak sa nahisgutang lugar apan pag-abot sa maong kapilya kalit giharas matud pa ang biktima sa mga nagriot dayon gipusil gamit ang wala mailhing kalibre sa armas tumong sa likod ug daling nisibat padulong sa Rasay Street, Bankerohan.
Daling gisapupo ug gidala sa Southern Philippines Medical Center (SPMC) ang biktima ug padayon pang gitambalan.
Naglusad na og parallel investigation ang kapulisan aron mailhan ang mga suspect nga mihasi ug mipusil sa biktima diin ang kaso giduso na sa General Investigation Section sa San Pedro PNP.
RadyoMaN Don Pulayao
