Kolkata, India- Usa ka babaye ang nanganak ug batang sirena sa India nga nabuhi lamang sulod sa pipila ka mga oras.
Giila ang maong babaye nga si Muskura Bibi, 23 anyos lumulupyo sa Kolkata, India.-
Ang talagsaon nga panghitabo gitawag nga Mermaid Syndrome, o Sirenomelia, ug mao ang ikaduhang kaso sa nasud ug ang ikalima sa kalibutan.
Si Muskura nanganak nga wala nakasinati ug sonogram ug nakit-an lamang ang kahimtang sa iyang bata sa dihang siya nanganak sa Chittaranjan, Deva Sadan Hospital.
Ang bata wala makalahutay tungod sa talagsaon nga kondisyon ug kini namatay paglabay sa upat ka oras human kini natawo.
Matud pa ni Dr. Sudip Saha, espesyalista sa bata sa ospital nga wala pa siya sukad makakita sa susamang sitwasyon ug kini ang unang kaso sa Sirenomelia sa estado ug ikaduha sa nasud.
Dugang pa niya nga ang bata adunay normal nga porma sa ibabaw nga bahin sa iyahang lawas apan sa ubos sa hawak ang mga bitiis niini naghiusa ug ang ubos nga bahin wala sa hingpit nga pag-umol.
Sumala pa sa maong doctor nga nahibaloan nila nga ang inahan sa bata wala nakasinati sa ultrasound sonography sa iyahang pagsabak. The Daily Mail ( Joan Gubalane , GSA ABCom Intern)
