Sergio Osmeña, Zamboanga del Norte – Patay ang usa ka babaye nga miyembro sa New People’s Army (NPA) nga taga-Dumingag, Zamboanga del Sur sa nahitabo nga engkwentro sa militar sa hilit nga lugar sa probinsya sa Zamboanga del Norte.
Sumala kang Lt. Col. Manaros Boransing, commanding officer sa 97th Infantry Battalion, Philippine Army, nahitabo ang engkwentro alas 4:30 sa hapon niadtong Domingo samtang nagpahigayon og security patrol ang mga tropa dihang nadawat ang report gikan sa mga sibilyan labot sa presensya sa mga NPA sa Barangay Kauswagan sa lungsod sa Sergio Osmeña, Zamboanga del Norte.
Base sa report nga nangilkil matud pa og kwarta ug nangolekta og pagkaon ang mga rebelde ngadto sa mga residente sa lugar.
Sigon ni Col. Boransing, mibaot sa 20 minutos ang sinukliay og bala nga miresulta sa kamatayon sa usa ka babaye nga mangugubat sa NPA nga gibana-banang nagpangedaron sa 20 hangtud 25-anyos.
Nailhan ang namatay nga si Alyas An-An, taga Brgy. Saad, Dumingag, Zamboanga del Sur.
Anaa na sa kustodiya sa Sergio Osmeña PNP ug Municipal Health Office ang patay nga lawas sa biktima.
Gikatakda nga itunol usab kini nila ngadto sa pamilya ang lawas sa napatay nga NPA aron makahatagan og desente nga lubong.
