Nagpabilin nga wala pa gihapon maila ang usa ka babayeng naligsan sa bus sa Solana, Jasaan, Misamis Oriental.
Kini ang gikumpirmar ni PO3 Edgar Ellevera sa Jasaan Municipal Police station.
Biktima ang naligsan sa bus sa Solana kinsa gituohan nga 28 anyos, bus-ok ang lawas ug sakto lang ang pamanit.
Nasayran nga igo lang mitabok sa dalan ang biktima apan kalit kining naligsan sa Kinglong bus nga gimaneho sa usa ka Isabelo Salon nga taga Magsaysay, Misamis Oriental.
Samtang wala namatikdan sa driver sa bus nga mitabok sa dalan ang biktima.
Matud ni Salon nga ngitngit ang dalan ug ulan-ulan niadtong tungora.
Nasayran nga sa pedestrian lane miagi ang biktima dihang nahitabo ang insidente.
Sa karon anaa na sa kostudiya sa kapolisan ang driver alang sa kasong reckless imprudence resulting to homicide.
Matud ni Jasaan polis PO3 Edgar Ellevera nga kung kinsa man ang nawad-an sa sakop sa pamilya, mahimong mobisita sa Galleon Funeral Parlor aron sa pagsusi sa biktima.
