Babaye sa Digos gipangita, nagapanusok?

Davao City – Gikumpirma sa Digos PNP nga duha na matud pa ang nabiktima sa giingong kalit nga pagpanusok sa usa ka babae nga masugatan niini didto sa Davao del Sur.

Suspek naila nga mao si Bebencia Maguiling, 50 anyos residente sa Bansalan, Davao Del Sur.

Sa eksklusibong pakighinabi kang SPO2 Thaddeus Oropel, on-duty desk officer sa Digos City Police Station, gibutyag niini nga wala nagpatala ang unang nabiktima sa maong babaye apan ang nakakita mismo ang nisumbong kanila.


Gani kagahapong adlawa, gipatala ni Michelle Ann Sangilan, 19 anyos, estudyante sa SPAMAS, ug residente sa Sinayawan Hagonoy, Davao del Sur, ang susamang nahitabo kaniya.

Saysay niini, padulong ang biktima sa ilang tulunghaan sa Brgy. Matti gikan sa ilang panimalay diin kalit na lamang kining gitusok tumong sa too nga bukton niini gamit ang wala pa masuta nga butang atol sa iyang pagsakay sa tricycle dayon daling midagan ang maong suspetsado.

Sa kabalaka, daling nagpamedical ang maong biktima ug gi-injection-an og anti-tetanus gumikan posible’ng dagom ang gigamit kaniya.

Sa pagkakaron giandam na ang kaso nga ipasaka ngadto sa suspek.

Sa pagpangalap og impormasyon sa kapulisan, matod pa sagad sa mga driver nga ilang nahinabi nag-ingon nga dugay na kining nagalaroy-laroy sa maong lugar ug adunay matud pa problema sa pangutok.

Samtang nagpahimangno ang kapulisan sa Digos nga kanunay magmaigmaton aron malikay sa susamang panghitabo ug makigkoordinar kanila aron dali kining ma-aksyunan.

RadyoMaN Jason Amisola

Facebook Comments