Trabahante sa Daneco gipusil-patay

Davao City – Patay ang usa ka Arthur Esmeralda, hamtong ang edad, minyo, empleyado sa Daneco NEA Disconnection Team ug residente sa Purok 4 Santol, Brgy. La Filipina, Tagum City, human kini gipusil alas-10:36 sa buntag niadtong Nobyembre 8 sa Purok 6, Brgy. San Roque, New Corella, Davao del Norte.

Atol sa imbestigasyon sa Davao del Norte Provincial Police Office (DNPPO), nasayran nga namutol og linya sa kuryente ang biktima uban ang usa ka Rey Tago gikan sa power line sa usa ka residential area.

Apan pagbalhin niini sa mosunod nga lugar, kalit na lamang kining gipusil sa usa ka lalaking armado nga naka suot og pula nga maskara sa wala masayring rason tumong sa likod nga bahin sa makadaghang higayon.


Si Jonaldo Reganan, witness sa maong panghitabo, nagkanayon nga nadunggan niini ang maong insidente ug nakadungog nga misinggit ang armadong lalaki nga dili na pabalikon ang mga biktima.

Human sa insidente, daling misibat ang suspek paingon sa wala matino nga direksyon.

Narekober sa crime scene ang tulo ka mga bala sa .45 nga pistola nga gigamit sa maong krimen.

Samtang gideklarang dead on arrival ang biktima sulod sa Regan Memorial Hospital sa Tagum City.

RadyoMaN Jason Amisola

Facebook Comments