General Santos City–Nailhan na sa mga personahe sa Traffic Management Unit (TMU) ang babayeng una nang namatay atol sa nahitabong disgrasya sa kadalanan niadtong milabay nga adlaw sa Prk San Miguel, Barangay Calumpang ning syudad.
Sumala pa ni Police Senior Master Sergeant Jose Sembrano Chief Investigator sa TMU nga ang biktima ang gi-ilang si Angelica Sumbilon 22 anyos ug mismong ang kaipon sa biktima nga si Ronnie Cawag ang mi-ila sa biktima.
Nasayran nga natingala nalang si Cawag nga wala nakauli ang iyang kapuyo sa ilang panimalay maong iyang gipangita, nakurat nalang kini dihang nasayran nga nabanggaan patay diay ang nasampit.
Base sa imbistigasyon sa kapulisan, migula nga ang kauban nga driver sa biktima nga si Bryan Daniel ang iyaha matud pang karelasyon ug dugay na niya kining ginahatud-sundo sa ginatrabahuan ug pinuy-anan niini.
Dugang pa ni P/Smsgt Sembrano nga tungod sa pagpamakak sa nasangpit nga suspect nga dili niya kaila ang biktima ug na pick-up lang niya sa dalan ang nahisgutan, posible kining pasakaan ug dugang kaso sa kapulisan nga Obstruction Of Justice.
Sumala pa niini nga usa ka dakong sayop ang gibuhat sa nasangpit nga driver tungod kay iyaha matud pang gilihis ang imbistigasyon sa kapulisan apan wala kini nag malampuson human nga gikabutyag sa mga kabanay sa namatay nga adunay relasyon ang duruha.
Karong adlawa matud pa takda nang kasohan ug reckless imprudence resulting to homicide ug obstruction of justice sa kapulisan ang nahisgutang suspect.(Dave Silagan)
