Nabas, Aklan – Patay rong sangka babayeng nabdos matapos nga magtambag ag mabun-an sa sangka kinagamo nga nagtuhaw kahapon it aga-aga sa Brgy. Toledo, Nabas, Aklan.
Rong biktima nakilaea kay Melissa Bernabe Magsael, 34-anyos ag residente man it nasambit nga lugar.
Sa pakikipag-angot it News Team kay PSSgt. Melvin Alba it Nabas PNP nga samtang rong pila ka miyembro it Nabas PNP hay nagapatigayon police visibility sa ginahiwat nga binayle sa lugar ay kumo besperas hay nakabaton sanda it impormasyon nga may unang kinagamo sa guwa it baylehan.
Insigida nanda nga gin adtunan ag pag abot sa area hay napundo eon rong kumosyon pero nakita it mga nag responde rong biktima nga nagahamyangon ag kamana man ro iba pa gid nga involve nga sanday John Carlo Cunana Canillo, 28-anyos; Joey Bernabe Magsael, 29-anyos; tanan residente it nasambit nga lugar ag Edilberto Rubio Mationg, 37-anyos anang manghod nga si Amorlito Rubio Mationg, 30-anyos tanan residente it Brgy. Union sa nasambit nga banwa.
Tanan ra sanda hay insigida man nga ginpang daea sa Ibajay District Hospital bangud nga may mga lastro ugaling rayang si Melissa hay gindeklara nga dead on arrival it doktor bangud sa anang tama it pagbuno sa tuo nga dughan.
Samtang sa ginpatigayon nga follow up ag maid-id nga imbestigasyon it Nabas PNP naga guwa nga basi sa panaysayon ni Joey Bernabe Magsael ag Janel Bernabe Magsael nga ko mga ala 1:00 it aga-aga rayang si Roberto Dela Cruz Catalan, 20-anyos ag residente it Purok 2, Toledo ro nag atake ag nagbakoe kay Joey Magsael nag tuga it maabong lastro.
Dugang pa gid nga base mat-a sa panaysayon ni Jheric Tanongon Dela Cruz, 26-anyos ag residente it Brgy. Nagustan nga samtang nagakinagamo nakita nana si Joey Magsael hay nakipag eogosan it siyaw.
Nagpahayag man si Jerome Torilla Sual, 26-anyos it Brgy. Gibon nga napan-uhan nana rong kinagamo mga pilang metro rong antad kana ag sa anang pag paeapit nakita na si Joey Magsael nga nagabaeabad it siyaw ag ana nga ginpaeapitan para kunta awaton pero nag-aeagawan pa sanda it siyaw nga ginkanina it anang tudlo.
Nakita man ni John Carlo rong kinagamo ag nagtinguha man imaw nga mapa untat ugaling inigo ra imaw it mataeom nga bagay sa anang waea nga batiis ag na nina.
Samtang nagtinguha man nga mag-awat si Edilberto Mationg ugaling suno kana inigo man imaw it mataeawis nga bagay nga indi na masayuran kon kanyo halin nga tumama sa anang sueang.
Suno mat-a kay Amorlito Mationg nga pati imaw hay maampara man kunta ugaling inigo man imaw it mataeom nga bagay sa anang tudlo nga indi man masayran kon siin halin.
Ginpahayag naman nga na-recover na sa possession ag control ni Joey Magsael rong kutsilyo nga nagahaba it 11 pulgada kaibahan rong tagob ag pueo.
Sanday Joey Magsael ag Roberto Catalan hay una makaron sa paghinakop it Nabas PNP para sa nagakaigo nga disposisyon samtang nagapadayon man ro imbestigasyon kon sin-o gid ro naka buno kay Melissa.
#TatakRMN <www.facebook.com/hashtag/tatakrmn?source=feed_text&epa=HASHTAG&__xts__%5B0%5D=68.ARBodF0EUcl3Boh6HJjiyzpd0PMa34vR-vxRyL3sZQwCHeQ9aEHBJ5XR2XCCnqs5w-H1sVIKEw2KeZfvUpYFU21aGRy5zKSg7J6Wem1kpTW4wLwH-5qO…>
