Davao City – Giluba sa usa ka lalake ang iyang kapuyo-puyo human nga nananghid kini nga bungkagon na ang istorya sa ilang paghigugmaay ug magbulag na sila sa hingpit kagabii.
Dili madawat sa usa ka alyas Cardo nga mawala sa iyang kinabuhi ang iyang kapuyo-puyo nga si Janeth Mendoza, 20 anyos, residente sa Rizal Extension ning siyudad mao iya na lamang kini gidunggab alas 6:50 kagabii.
Gikan pa sa kauluhan ang biktima ug miari lang dinhi sa dakbayan aron pormal mananghid nga magbulag na sila apan nasayran ni Cardo nga ang rason ngano biyaan na siya mao ang pagbaton og laing lalake ni Janeth.
Butang nga gikasuko sa suspek ang desisyon sa biktima busa mikuha kini og gunting ug gisuwayan og patay si Janeth pinaagi sa pagluba apan maayo na lang kay sa kamot lang naigo.
Nasuta nga lango sa bino makahubog ang suspek dihang gisuwayan niini og kutlo ang kinabuhi sa iyang kanhi hinigugma.
Daling gidala sa Southern Philippines Medical Center (SPMC) si Janeth ug anaa na kini sa luwas nga kahimtang base sa pinaka-ulahi nga medical bulletin niini.
RadyoMaN Joel Viray
