General Santos City–Nagpadayon pa karon ang ginahimong imbestigasyon sa kapulisan sa posibleng motibo sa pagpusil patay sa biktimang si Freya Joy Cuevas, 27 anyos, residente sa Purok Maunlad, Barangay Apopong, Gensan kansa una nang gipusil sa may Marcos Avenue, Brgy. Apopong ning dakbayan sa Gensan.
Nasayran nga alas 5:00 pasado ang takna kagahapon dihang gipusil sa wala pa mailhing suspek ang biktima sa Barangay Apopong. Naka-angkon ug igo pinusilan sa likod nga bahin ang biktima nga milapos sa iyahang dughan nga nahimong hinungdan sa iyahang kamatayon.
Subay sa inisyal nga imbestigayson sa kapulisan, ayha pa man nahitabo ang pagpamusil ngadto sa biktima, nakadawat na kini ug mga bahad sa iyahang kinabuhi. Sa pagsuwat niining balita, wala pa gibutyag sa kapulisan kung asa gikan ug unsay motibo sa pagbahad sa kinabuhi sa babayeng biktima. Sa karon hustisya ang singgit sa kabanay sa biktima ug sila nanghinaot nga mailhan ug madakpan ang suspetsadong nagpaluyo sa pagpatay.(LVR)
