Babayi nalumos-patay sa Sto. Tomas

Davao City – Nanawagan karon ang kapulisan sa Sto.Tomas, Davao del Norte kung kinsa ang nawalaan og miyembro sa pamilya nga makigkoordinar kanila, human nga usa ka babayi ang napalgang patay sa mga residente sa sapa sa Barangay Kinamayan, Sto.Tomas, Davao Del Norte alas 8:00 sa gabii niadtong Lunes (Oktubre 31, 2022).

Sa interbyu sa DXDC RMN Davao kang Police Staff Sergeant Michael Lacaba, personahe sa Sto.Tomas Municipal Police Station (MPS), gisulti niini nga wala silay nadawat nga report nga adunay na-missing sa Sto.Tomas.

“Ang nag-report kay kadtong mga residente didto. Human, pagkakita nila nga naay tawong galutaw, nagtawag sila’g kapitan, taga barangay,” saysay ni Lacaba.

Subay sa resulta sa autopsy ni Police Captain Kristine Joy Galvez, MD, Chief Medico-Legal Section FFU XI, nasuta nga Asphyxia Secondary to Drowning ang gikamatyan sa biktima. Walay nakitang external injuries o foul play.

Ang babayi anaa sa 155cm ang gitas-on, straight ug itom ang buhok ug gibana-banaang anaa sa 25 anyos.

Mamahimong makigkoordinar sa Sto. Tomas MPS pinaagi sa ilang hotline numbers, 09072085978 ug 09677039787 kabahin sa insidente.

RadyoMaN Kirby Manzon