Gipasalig sa Land Transportation Office kon LTO nga ma-release na ang mga backlog nga mga plaka pag-abot sa Disyembre 2019.
Sa interview sa RMN Malaybalay ngadto kang LTO Valencia Head Juntele Goc-ong, gibutyag ninii nga ang available nga mga plaka sa mga sakyanan nga gi-apod-apod na sugod atong Hulyo 5 mao pa ang gikan July 2016 hangtod December 2016.
Sumala pa niini nga kining mga plaka gihimo gikan sa LTO Central office ug gitakdang iapod apod ngadto sa mga dealer sa mga sakyanan nga gilangkuban sa Kia, Mitsubishi, Toyota ug Ford.
Gipasabot sa LTO nga unang batch pa kini sa mga plaka samtang ang mosunod nga batch alang na sa mga single motor.
Madumduman nga nalangan ang pag apod apod sa mga plaka sa mga sakyanan tungod sa TRO nga gipasaka batok sa manufacturer sa mga plaka nga unang nakakuha sa contrata sa buhatan sa LTO Central office.
Kadtong mga sakyanan nga narehistro paubos sa Hunyo 2016 dili pa makuha tungod kay anaa pay kaso sa korte.
Dili pa usab available sa karon ang plaka alang sa mga motor.
