BACOLOD CITY – Ginamandu-an ni Mayor Bing Leonardia ang Bacolod City Police Office nga lakip sa pagabantayan sa ti-on sang kagab-ihon ang nagakatabo nga vandalism ukon pagpaminta sang mga pader kag pila ka establishments.
Suno kay City Administrator Atty. John Orola, nga dapat madakpan ang pila ka mga grupo nga naga-tuga sang kahigku sang syudad – ilabi na nga natalana maga-host ang Bacolod sang isa sa mga meeting sang ASEAN Summit.
Ginpahayag ni Orola nga masami sa ti-on sang kagab-ihon nagapa-minta ukon nagapang-spray ang pila ka grupo sang mga kabata-an, gani dapat naka-alerto diri ang pulis.
Ginpahayag naman ni Bacolod City Police Office OIC Director PS/Supt. Jack Wanky nga iya na ginmanduan ang tanan nga mga station commanders nga magpatrolya para dakpon ang mga nagapanghalit sa syudad.
Sa idalom sang City Ordinance No. 534 ukon Anti-Vandalism Ordinance of 2011 may ara sang penalidad nga P3,000 tubtob P5,000 kag pagkapriso tubtob isa ka tuig ang sin-o man nga nadakpan nga nagalapas sa ordinansa.
Dapat man nga ibalik sa orihinal ang itsura sang ginkurisan lakip man serbisyo sa buluthuan kag barangay ang himuon sang natungdan.
Dapat man nga ibutang sa Values Education subject ang Anti-Vandalism campaign sa syudad. /dyHB – BACOLOD
Facebook Comments
