Roxas City, Capiz – Yara na sa paghinakop sang Roxas City PNP ang isa ka bag nga may unod nga mga bala, magazine kag granada matapos ginturn-over sang isa ka residente sa mga barangay officials sang Barangay Libas, Roxas City. Ginpahayag ni Acting Punong Barangay Rey Araw-araw nga personal nga ginturn-over sa ila sang isa nila ka residente ang isa ka sling bag nga may unod nga mga bala, magazine kag Granada.
Suno diri nga ginbilin lamang sang isa ka retirado nga pulis ang nasambit nga bag sa balay sang isa ka residente, napulo na ka tuig ang nakaligad apang nadiskubrehan gid lamang ini sang nagpanghimos sang iya balay ang amo nga persona. Kalakip sa unod sang amo nga bag ang mga masunod: pito ka bala sang M16 armalite rifle, apat M16 armalite rifle magazine, apat ka mga rifle grenade kag 65 ka mga bala sang M14.
Dako naman pagpasalamat ni Police Supt. Dante Tayco, hepe sang Roxas City PNP nga wala naglupok ang amo nga mga bala. Suno kay Tayco nga tuman ka delikado ang mga bala sa ti-on nga nalab-ot sang mga kabataan. Magapatigayon sa gihapon sang imbestigasyon ang Roxas City PNP angut sa na-recover nga mga bala, magazine kag granada.
