Bag-ohay nga pagtahan sa NPA Commander nga si Ka Jayto, rason sa pagka-rekober sa mga armas sa Malitbog

Gikataho nga gumikan sa impormasyon nga nakuha sa bag-ong mitahan nga New People’s Army (NPA) Commander nga si Alias Ka “Jayto” sa SRSDG MTJ Eagles, narekober ang mga tag-as nga kalibre sa armas ug mga bala didto sa Sitio Larapan, Brgy Kiabo, Malitbog, Bukidnon kadlawon adtong Domingo.

Gipangunahan sa 16th Infantry (Maglilingkod) Battalion, ilawom sa 402nd Infantry (Stingers) Brigade ang gipahigayong Intelligence Operations sa pagkasapon ni Alias Ka “JunJun”, nga ang kinsa maoy gitudlo nga naghawid sa mga armas didto sa naasoy nga komunidad.

Narekober ang usa ka M16 A1 Rifle, usa ka improvised grenade launcher, usa ka UZI, ug duha ka magazines nga naay bala.

Dako ang natabang sa impormasyong gipagula ni Ka Jayto nga miresulta sa pagkarekober sa mga kagamitang panggubat. Pamatood usab nga epektibo ang programang National Task Force to End Local Communist Armed Conflict (NTF-ELCAC) sa kasamtangang administrasyon ni Presidente Rodrigo Duterte.

Padayon ang ginapahigayong Focused Military Operations sa 16th IB batok sa komunistang grupong NPA aron nga maangkon ang kalinaw ug kausaban sa ginsakupan.

Apan, aron nga malikayan ang mga pagkakalas sa kinabuhi, ginaaghat karon sa tropa sa kasundaluan ang pagtahan sa mga nahibiling miyembro sa NPA sa pagbalik sa sabakan sa balaod, malinawon nga pamuyo, ug pagdawat sa mga programa sa gobyerno nga dakong ikatabang kanila.