Malaybalay City, Bukidnon – Gi-deploy sa Eastern Mindanao Command sa Armed Forces of the Philippines (AFP) ang dugang batalyon ngadto sa 4th Infantry Division (4ID) kagahapon.
Pormal nga gidawat sa Headquarters sa 4th Infantry Division ang 65th Infantry (Stalwart) Battalion nga gipangunahan ni Ltc Richard B Rabaca.
Gawas sa paghimo sa na-andang trabaho sa kasundaluhan nga combat operation, makatabang usab kini sa pagresponde panahon sa natural ug man-made nga kalamidad.
Sa interview sa RMN Malaybalay ngadto kang MGen Ronald Villanueva, ang commander sa 4th ID, gibutyag niini nga dugang puwersa ang 65th IB sa 4th ID karong tuiga ug dakong tabang ang mao nga batalyon sa mga dapit nga gipatutukan ni Pangulong Rodrigo Duterte aron mahuman ang problema sa pagpanghasi sa mga armadong grupo ug aron mosunod na dayon ang kalambuan sa komunidad dinhi sa Mindanao.
Matud ni Villanueva nga daghan batallion ang gidapala sa EASTMINCOM nga muhimo usab ug community based- dialogues sa kabarangayan, makiglambigit sa mga local opisyal aron matumbok ang mga indibidwal o grupo nga nagsuporta sa teroristang New Peoples Army kon NPA.
