Bag-ong Chief of Police nan Surigao City tagpasalig an pagpalapad sa kampanya batok kreminalidad

Sumaya pa ni Supt. Diomedes Cuadra Jr. an bag-ong miinkod na Chief of Police nan Surigao City, palapdan pa nija an kampanya batok kreminalidad, an paghatag nan kasulbaran sa pipila ka insidente sa lungkab, pagpusil-patay ug iban pa. Sa Turn Over Ceremonies ganina tagpulihan niini si Supt. Jay Baybayan na kapin 10 ka buyan an pagserbisyo sa siyudad. Tag-angkon pa ni Cuadra nakurat sija sa mando sa Regional Headquarters na sija an ipahimutang sa puwesto. Hinoon plano nija mohimo nan dugang lakang dili lamang sa kreminalidad kundili lakip an batok sa illegal na droga, illegal na pagsugal sanan iban pa. Sa habig isab ni Baybayan, dako an pasalamat niini ngadto sa mga kaiban, lokal na opisyales sanan iban pa na nagpalujo sa ija liderato. Tagtumbok pa na Dili angay na mabayaka an iban gumikan kay an sunod na assignment, an pagpanguyo balik sa PNP Provl. Mobile Force Company. Sa Turn Over Ceremonies mitambong didto an PNP Provl. Director Senior Supt. Anthony Maghari lakip an City Legal Officer Atty. Manuelito Delani.