SARANGANI PROVINCE–Nagsugod na sa iyang pangatungdanan isip OIC Provincial Director sa Department of the Interior and Local Government/DILG Sarangani si Engineer Samuel Camaganacan puli kang Atty. Rochelle Mahinay-Sero nga mao na karoy provincial director sa DILG South Cotabato.
Kagahapon, adlaw nga Lunes, niduaw kini sa regular sesyon sa Sangguniang Panlalawigan alang sa iyang courtesy call kung diin mainiton kining giabi-abi sa mga board member sa pagpanguna ni Temporary Presiding Officer Board Member George Falgui.
Niaging Byernes, napuno ang opisina sa DILG Sarangani tungod sa nahitabong turnover ceremony nga gitambungan mismo nila Governor Steve Chiongbian Solon, DILG Regional Director Josephine Leysa, Board Member Tatang Paras og uban pang provincial og city director sa DILG sa tibuok Rehiyon Dose, sa pagsuporta nila Senador Manny og Congressman Ruel Pacquiao.
Segun ni DILG Regional Director Leysa, nasayud kini nga magkasinabot sila ni Governor Solon tungod kay managsama ang ilang dedikasyon nga mu-serbisyo nga may integridad og responsibilidad ngadto sa katawhan og sa Ginoo.
Gikan sa DILG Sultan Kudarat si Engineer Camaganacan isip outcome manager. Una nya kining assignment isip provincial director maong iyang gipanghinaot nga una niining tutukan sa Sarangani Province ang balaod sa SGLG kon Seal of Good Local Governance aron daghan pang LGU ang makadawat sa maong prestihiyusong pasidungog.
Lakip na ang Local Legislative Awards aron maka-engganyo pa sa mga sanggunian nga mu-panday og daghang resolusyon og ordinansa nga dakong ikaayo sa mga residente.
Mapasalamaton kini sa iyang gipulihan nga si Atty. Sero tungod sa daghang nabuhat sa DILG Sarangani subay usab sa mga direktiba ni Pangulong Rodrigo Duterte.
