South Cotabato — Patay ang usa matud pa ka miyembro sa Budol-Budol Gang samtang dead on arrival usab sa usa ka hospital sa Koronadal City ang bondsman niini human gipusil sa wala pa mailhing suspek kagahapong adlawa sa may GenSan Drive, Koronadal City.
Giila ang biktima nga silang Manny Alvarez Diaz, legal age, gikaingong miyembro sa budol-budol gang nga Taga Tondo Manila, ug Violebeth Guiamalon.
Si Diaz ang una nang nadakpan sa kapulisan sa Koronadal City niadtong Sept. 11, human nga gisumbong sa usa ka senior citizen nga nabiktima sa nasampit ug mga kaubanan niini.Samtang si Guiamalon maoy nitabang sa nasampit nga makagawas sa prisohan pinaagi sa pagpyansa.
Sa inisyal nga imbistigasyon sa kapulisan, nasuta nga bag-uhay lang guyud nakagawas sa Prisohan sa Koronadal PNP ang nasampit nga biktima ug padulong unta sila sa usa ka mall sa Koronadal dihang pag abot sa lugar, gipusil sila sa mga suspek nga nakamotorsiklo.
Patay gilayon si Diaz samtang nadala pa sa ospital ang biktimang si Guiamalon apan gideklarang DOA.
Usa sa mga anggulong ginatan-aw karon sa kapulisan ang kalabutan sa gikalambigitang grupo sa biktima nga Budol-budol gang. Posible sumala pa nga daghang nasuko sa biktima gumikan ginahimo nilang pagpangilad.
