Zamboanga del Norte – Sa paglingkud karon sa mga bag-ong komposisyon sa mga sakop sa Sangguniang Panlalawigan sa Zamboanga del Norte sugod kaniadtong Dominggo sa udto, Hunyo 30, 2019, human usab sila makadaug sa 2019 Midterm Elections, mipahigayon gilayon sila sa piniliay alang sa mamahimo nga mangulo sa provincial legislative council atol sa gipahigayon usab nga primero nga regular session niini kaniadtong Lunes, Hulyo 1, 2019.
Si Atty. Senen O. Angeles sa iyang pagdaug sa ikatulo ug katapusan nga termino isip Vice-Governor sa Zamboanga del Norte ang mangulo ra gihapon sa sangguniang panlalawigan isip Presiding Officer niini sumala sa balaod.
Atol sa gihimo nga piniliay sa maong session, nagpabilin sa ilang tagsatagsa nga position ang third termers sa segundo distrito nga sila si Atty. Julius C. Napigquit isip Presiding Officer Pro-Tempore; Atty. Crisologo A. Decierdo isip Majority Floor Leader; Board Member Ronilio D. Lee isip Assistant Majority Floor Leader ug; Board Member Patri B. Chan isip Minority Floor Leader.
Milingkud usab isip bag-ong pinili nga mga bokal sila si Board Member Anacleto H. Olvis, Jr. nga nagrepresentar sa primero distrito ug ingon man si Board Member Constantino C. Soriano, Jr. sa tersero distrito nga pulos sakop sa minoriya.
Si Olvis ang mipuli ni kanhi Board Member Annabel G. Jalosjos sa primero distrito sanglit midagan kini sa pagka-mayor sa lungsod sa Sibutad samtang si Soriano ang mipuli usab ni kanhi Board Member Angel M. Carloto sa tersero distrito sanglit wala na kini milansar pag-usab sa pagka-board member tungod sa edad.
Nasayran nga sa sunod regular session karong Lunes, Hulyo 8, 2019, maplantsa na usab sa mga sakop sa sangguniang panlalawigan ang mamahimo nga mga chairmen, vice-chairmen ug ingon man mga sakop sa nagkadaiya nga standing committees niini.
