Duha ka oras human makumpirmang patay si Mayor David Navarro, nanumpa isip hulip sa iyang puwesto ang 80 anyos nga bise mayor nga si Glorife Roa isip bag-ong mayor sa lungsod sa Clarin, Misamis Occidental.
Sa pagpakighinabi sa media ngadto kang Emeterio Roa, anak sa bise mayor kinsa maoy Disaster Risk Reduction and Management Officer sa lungsod, gisunod nila ang tambag sa mga adunay kahibalo sa balaod nga gilayong manumpa aron dili ma-vaccum ang operasyon sa munisipyo sanglit adlaw’ng tingtrabaho man nahitabo ang pagpatay kang Navarro.
Huwes gikan sa Ozamiz City ang nagpahigayon sa oath taking kang Roa, matud pa ni Emeterio.
Base sa balaod, kung mamatay o kaha mawad-an og legal nga kapasidad ang usa ka mayor, ang bise mayor maoy utomatikong mohulip kaniya.
Gitawag kini og law of succession.
Karong adlawa, ang numero uno’ng konsehal nga ikaduhang anak sa namatay’ng mayor nga si Mel Davidson, ang manumpa isip hulip kang Roa sa pagka-bise Mayor.
Nahidangat pasado alas-6:00 kagahapon sa buntag ang patay’ng lawas sa mayor sakay sa usa ka barko gikan sa Cebu City kung asa gibanhigan ang convoy nga magdala unta kaniya ngadto sa piskalya aron ipasaka ang mga kaso batok kaniya human sa iyang pagpangulata og masahista niadtong Oktubre 23 sa gabii.
